Tolosaldeko Hitza

Bihar Larraitzen festa eguna izango da, urtero bezala larreak irekiko baitituzte. Hori dela eta, hainbat ekitaldi antolatu dituzte eguna jai giroan ospatzeko. Jai eguna Aralarko larreak irekitzeko aitzakia izaten da urtero. Azken urteetan egin den bezala, aurten ere Gipuzkoako Foru Aldundiko Landa Ingurunearen Garapenerako departamenduak eta Enirio Aralarko Mankomunitateak antolatu dute jaia eta egitarau oparoa prestatu dute egun pasa egiteko.

Ostegunean 18.000 ardi, 650 behor eta 700 behi inguru igoko dituzte Aralarko larreetara, Txindoki ondoko lepotik hasi eta Igaratza aldera arteko larreetara alegia, eta bertan igaroko dute uda, baita udazkeneko zati bat ere. Azkeneko urteetan artzain gutxiago dauden arren, Aralarren bazkatzen egoten den abere kopuruak ez du behera egin. Joxe Antonio Irastorza Enirio Aralar Mankomunitateko basozainak artzain bakoitzak kantitate handiagoak dituelako dela dio. «Lehenago ziren ganadu-zale gehiago, baina kantitate gutxiagorekin. Orain ganadero batek lehenago zenbaitek adina abere izaten ditu, mekanizazioa dela eta, gauzak erraztu egiten dira, bai udan belarra biltzeko, eta lehenago ere ardiak jeizten eskuz ari bazinen muga bat zenuen. Baina orain mekanizazioaren ondorioz kantitateak gora egin du».